ടൊയോട്ട ഹൈബ്രിഡ് കാറുകള്‍ പരിശോധനയ്ക്കായി തിരികെ വിളിക്കുന്നു

വാഹനാപകടത്തിന് കാരണമായേക്കാവുന്ന തകരാറിനെ തുടര്‍ന്നാണ് തിരികെ വിളിക്കുന്നത്

ആഗോളതലത്തില്‍ ടൊയോട്ടയുടെ ഹൈബ്രിഡ് കാറുകള്‍ പരിശോധനയ്ക്കായി തിരികെ വിളിക്കുന്നു. ഏകദേശം 24 ലക്ഷം വാഹനങ്ങളാണ്‌ തിരികെ വിളിച്ചിരിക്കുന്നത്. 2008 ഒക്ടോബറിനും 2014 നവംബറിനുമിടയില്‍ നിര്‍മിച്ച ടൊയോട്ട പ്രിയസ്, ടൊയോട്ട ഔറിസ് തുടങ്ങിയ ഹൈബ്രിഡ് വാഹനങ്ങളിലുള്ള ഹൈബ്രിഡ് സംവിധാനത്തിലെ തകരാര്‍ മൂലം ഓട്ടത്തിനിടയില്‍ നിന്ന് പോകാനുള്ള സാധ്യത കണക്കിലെടുത്താണ് കമ്പനിയുടെ നടപടി.ടൊയോട്ടയുടെ മാതൃ രാജ്യമായ ജപ്പാനില്‍ മാത്രം പത്ത് ലക്ഷത്തിലധികം വാഹനങ്ങളാണ് തിരച്ച് വിളിക്കേണ്ടി വരുന്നത്. നോര്‍ത്ത് അമേരിക്കയില്‍ നിന്ന് 8.3 ലക്ഷം കാറുകള്‍, യൂറോപ്പില്‍ 2.9 ലക്ഷം കാറുകള്‍, ചൈനയില്‍ 3000 കാറുകളുമാണ് തിരിച്ച് വിളിക്കുന്നത്. ലോകത്തെ മറ്റ് പല രാജ്യങ്ങളില്‍ നിന്നും ടൊയോട്ടയുടെ ഹൈബ്രിഡ് വാഹനങ്ങള്‍ തിരിച്ച് വിളിക്കുന്നുണ്ട്. എന്നാല്‍, വാഹനങ്ങളുടെ എണ്ണം സംബന്ധിച്ച കാര്യത്തില്‍ വ്യക്തതയില്ലെന്നാണ് റിപ്പോര്‍ട്ടുകള്‍.1997 മുതല്‍ പ്രിയസ് ഉള്‍പ്പെടെ ഒരു കോടിയിലധികം ഹൈബ്രിഡ് ഗ്യാസോലിന്‍ ഇലക്ട്രിക് വാഹനങ്ങളാണ് ടൊയോട്ട ആഗോളതലത്തില്‍ വിറ്റത്. എയര്‍ബാഗ്, ഫ്യൂവല്‍ എമിഷന്‍ കണ്‍ട്രോള്‍ യൂണിറ്റ് എന്നിവയുമായി ബന്ധപ്പെട്ട് 2016-ല്‍ ടൊയോട്ട ആഗോളതലത്തില്‍ 33.7 ലക്ഷം കാറുകള്‍ തിരിച്ചുവിളിച്ചിരുന്നു.

Toyota Hybrid Cars Recall.