સુરતમાં સરકાર દ્વારા ખાનગી શાળામાં લેવામાં આવતી બેફામ ફી પર રોક લગાવતો નિયમ લાગુ કરવામાં આવ્યો હોવા છતાં ખાનગી શાળાના સંચાલકો સરકારનાં નિર્ણયનું પાલન કરી રહ્યાં નથી જેને લઈ વાલીઓ અને ખાનગી શાળાનાં વહીવટી સંચાલકો વિરુદ્ધ છેલ્લા લાંબા સમયથી તકરાર ચાલી રહી છે. અનેકવાર વાલીઓ દ્વારા શાળામાં થતી ફીની લૂંટ સામે વિરોધ પણ કરાયો છે છતાં ખાનગી શાળાની નીતિમાં કોઈ ફેર પડ્યો નથી.
ખાનગી શાળાઓએ વિદ્યાર્થીઓના ભવિષ્ય સાથે ચેડાં કર્યા છે અને વાલીઓને બાનમાં લેવા માટે વિદ્યાર્થીઓનાં પરિણામ અટકાવી દીધા છે. ખાનગી શાળાની આવી મનમાની અને દાદાગીરી સામે હવે વાલીઓ ઉગ્ર લડતના મૂડમાં રસ્તા પર ઊતર્યા છે.
વાલીઓ ગાંધી ચીંધ્યા માર્ગે ખાનગી શાળાના સંચાલકો વિરુદ્ધ અનશન કરી રહ્યા છે. વાલીઓ છેલ્લા 6 દિવસથી સુરતના સિટીલાઇટ ખાતે આવેલા અણુવ્રત દ્વાર પાસે ઉપવાસ પર ઊતર્યા છે. વાલીઓ ખાનગી શાળાની મનમાની વિરુદ્ધ વિરોધ કરી સરકારની આંખ ઉઘાડવાનો પ્રયાસ કરી રહ્યા છે. મહત્ત્વની વાત તો એ છે કે વાલીઓ દ્વારા શરૂ કરાયેલા અનશનનાં 6 દિવસ વીતી ગયા છે પણ કોઈ શૈક્ષણિકતંત્રના અધિકારી કે સરકારના કોઈ પણ નેતા વાલીઓને મળવા આવ્યા નથી. અનશન દરમિયાન એક પુરુષ અને એક મહિલાની તબિયત પણ લથડી છે..