പ്രളയത്തില്‍ സ്റ്റാറായി കേരള പോലീസും
53,000 പേരെ പോലീസ് സേനാംഗങ്ങൾ നേരിട്ടെത്തി രക്ഷിച്ചു

പ്രളയ കാലത്ത് ജീവനും സ്വത്തിനും സംരക്ഷണം നൽകുകയെന്ന ചുമതല അക്ഷരാർഥത്തിൽ നിറവേറ്റി കേരള പോലീസ്

വലിയൊരു ദുരന്തത്തെ മറികടക്കുന്നതിന് ഒരുമയോടെ പ്രവർത്തിക്കാൻ പോലീസിനായി.53,000 പേരെയാണ് പോലീസ് സേനാംഗങ്ങൾ നേരിട്ട് രക്ഷിച്ചത്. ഒരുലക്ഷത്തിലധികം പേരെ രക്ഷിച്ച് സുരക്ഷിത സ്ഥാനങ്ങളിലെത്തിക്കാനും വഴിയൊരുക്കി.രക്ഷാപ്രവർത്തകർക്ക് പോകുന്നതിനുള്ള വഴിയൊരുക്കുകയും പലയിടത്തും ഗതാഗതം നിയന്ത്രിക്കുന്നതിനും അവർ രാപകലില്ലാതെ നിലയുറപ്പിച്ചു. അണക്കെട്ടുകൾതുറക്കും മുമ്പ് താമസക്കാരെ മാറ്റുന്നതിനും പോലീസ് നേരിട്ട് ഇറങ്ങി. സായുധസേനാ വിഭാഗങ്ങൾ, വനിതാ കമാൻഡോകൾ, ആർ.ആർ.ആർ.എഫ്, ലോക്കൽ പോലീസ്, പോലീസ് ട്രെയിനിങ് കോളേജിലെയും കേരള പോലീസ് അക്കാദമിയിലെയും ട്രെയിനികൾ ഉൾപ്പടെയുള്ളവർ ദൗത്യത്തിൽ പങ്കെടുത്തു. മേൽനോട്ടംവഹിച്ചത് സംസ്ഥാന പോലീസ് മേധാവി ലോക്നാഥ് ബെഹ്റ ആയിരുന്നു.രക്ഷപ്പെടുത്തണമെന്ന ആവശ്യവുമായി എത്തിയവരെ ആശ്വസിപ്പിക്കാനും പോലീസ് മറന്നില്ല.പ്രളയം രൂക്ഷമായതോടെ ഒറ്റപ്പെട്ടവരെ രക്ഷപ്പെടുത്തുന്നതിനായുള്ള ഫോൺവിളികൾ വർധിച്ചു. ഇതേത്തുടർന്ന് ജില്ലകളിൽ രൂപവത്കരിച്ച കൺട്രോൾ റൂമുകൾക്ക് പുറമേ പോലീസ് ആസ്ഥാനത്തും 10 ലൈനുകളുള്ള കൺടോൾ റൂം തുറന്നു. രക്ഷപ്പെടുത്തണമെന്ന ആവശ്യവുമായി എത്തിയത് ഒന്നര ലക്ഷത്തിലധികം ഫോൺ കോളുകളാണ്. ഇവ രക്ഷാപ്രവർത്തകർക്ക് കൈമാറുന്നതിനൊപ്പം, വിളിച്ചവരെ ആശ്വസിപ്പിക്കാനും പോലീസ് മറന്നില്ല. കുടുങ്ങിക്കിടന്നവരിൽ ഫോണിൽ കിട്ടാവുന്നവരെ വിളിച്ച് പോലീസ് ധൈര്യം പകരുകയും ചെയ്തു. ദുതിതാശ്വാസത്തിനായി സാധനസാമഗ്രികൾ പോലീസ് സ്റ്റേഷനുകളിൽ സ്വീകരിച്ച് പ്രധാന കളക്‌ഷൻ സെന്ററുകളിലേക്ക് കൈമാറി. പ്രളയാനന്തരം വീടുകൾ വൃത്തിയാക്കുന്നതിനും പുനരധിവാസ പ്രവർത്തനങ്ങൾക്കും പോലീസ് മുന്നിലുണ്ട്. വെള്ളമിറങ്ങിക്കഴിഞ്ഞ് വീട്ടിലേക്കെത്തുമ്പോൾ ശ്രദ്ധിക്കേണ്ടകാര്യങ്ങളെക്കുറിച്ച് കോട്ടയം പോലീസ് അഞ്ചുമിനിട്ട് വീഡിയോയും ഇറക്കി.

Kerala floods; kerala police are the Stars.