കുമ്മനം തിരുവന്തപുരത്തേക്ക് തിരിച്ചെത്തതാൻ സാധ്യത

മിസോറാം തിരഞ്ഞെടുപ്പ് ഫലത്തിന് ശേഷം അദ്ദേഹത്തെ തിരികെ എത്തിക്കുമെന്നാണ് സൂചനകൾ

ശബരിമലയിലെ യുവതീപ്രവേശം വലിയ രാഷ്ട്രീയ പ്രശ്നമായി മാറിയ സാഹചര്യത്തില്‍ കുമ്മനത്തെ മടക്കിക്കൊണ്ടുവരാന്‍ ബിജെപി കേന്ദ്രനേതൃത്വത്തിനുമേല്‍ സമ്മര്‍ദ്ദവും ഏറുകയാണ്

മിസോറം ഗവര്‍ണര്‍ സ്ഥാനം ഒഴിഞ്ഞ് കുമ്മനം രാജശേഖരന്‍ ലോക്സഭാ തിരഞ്ഞെടുപ്പില്‍ തിരുവനന്തപുരത്ത് ബിജെപി സ്ഥാനാര്‍ഥിയായേക്കും. അദ്ദേഹം സജീവരാഷ്ട്രീയത്തില്‍ മടങ്ങിവരണമെന്നും പൊതുതിരഞ്ഞെടുപ്പില്‍ മല്‍സരിക്കണമെന്നും ബിജെപി പ്രവര്‍ത്തകര്‍ ആഗ്രഹിക്കുന്നുവെന്ന് സംസ്ഥാന വക്താവ് എം.എസ്. കുമാര്‍ പറഞ്ഞു . ശബരിമലയിലെ യുവതീപ്രവേശം വലിയ രാഷ്ട്രീയ പ്രശ്നമായി മാറിയ സാഹചര്യത്തില്‍ കുമ്മനത്തെ മടക്കിക്കൊണ്ടുവരാന്‍ ബിജെപി കേന്ദ്രനേതൃത്വത്തിനുമേല്‍ സമ്മര്‍ദ്ദവും ഏറുകയാണ്. ശബരിമല സമരം ആളിക്കത്തിക്കാൻ ബിജെപി പല വഴികളും പയറ്റുന്ന ഈ സാഹചര്യത്തിലാണ് കുമ്മനത്തിന്റെ തിരിച്ച് വരവ് എന്നത് ശ്രദ്ധേയമാണ് .ശബരിമല സ്ത്രീ പ്രവേശനവിഷയത്തിൽ സംസ്ഥാന അധ്യക്ഷൻ ശ്രീധരൻ പിള്ള അടിക്കടി നടത്തുന്ന നിലപാട് മാറ്റം പാർട്ടിക്ക് ക്ഷീണം ഉണ്ടാക്കിയെന്നാണ് ഒരു വിഭാഗത്തിന്റെ ആരോപണം. ശ്രീധരൻ പിള്ള സമരക്കാരെ സംരക്ഷിക്കുന്നില്ലെന്ന പരാതിയുമായി മുരളീധര പക്ഷം ദേശീയ നേതൃത്വത്തെ സമീപിച്ചിരുന്നു .ശബരിമല സമരം പാർട്ടിക്ക് ഗുണകരമായ രീതിയിൽ മാറ്റാൻ ശ്രീധരൻ പിള്ളയ്ക്ക് കഴിഞ്ഞില്ലെന്നാണ് പാർട്ടിക്കുള്ളിലെ വിലയിരുത്തൽ. യുവമോർച്ചാ വേദിയിൽ നടത്തിയ പ്രസംഗവും അടിക്കടിയുള്ള നിലപാട് മാറ്റവും ദേശീയ നേതൃത്വത്തിന്റെ അതൃപ്തിക്കും ഇടയാക്കി. യുവതി പ്രവേശനത്തിനെതിരെയുള്ള പ്രതിഷേധം സെക്രട്ടേറിയേറ്റിന് മുമ്പിലേക്ക് മാറ്റിയ തീരുമാനത്തോടെ പാർട്ടിക്കുള്ളിലെ പടലപ്പിണക്കങ്ങൾ മറനീക്കി പുറത്തുവന്നു.ശബരിമല സമരം വീണ്ടും ആളിക്കത്തിക്കാൻ കുമ്മനം രാജശേഖരനെ തിരികെ എത്തിക്കാനാണ് ബി ജെ പി നീക്കം.. ബിജെപി ദേശീയ നേതൃത്വത്തോട് ഈ ആവശ്യം ഉന്നയിച്ചുവെന്നാണ് സൂചനകൾ. മിസോറാം തിരഞ്ഞെടുപ്പ് ഫലത്തിന് ശേഷം ശേഷം അദ്ദേഹത്തെ തിരികെ എത്തിക്കുമെന്നാണ് സൂചനകൾ. ശ്രീധരൻ പിള്ളയെ മാറ്റി അധ്യക്ഷ സ്ഥാനത്തേയ്ക്ക് കുമ്മനത്തെ വീണ്ടും നിയോഗിക്കാനാണോ നീക്കം എന്ന കാര്യത്തിൽ വ്യക്തതയില്ല. കെവിഎസ് ഹരിദാസിന്റെ ഫേസ്ബുക്ക് പോസ്റ്റ് കുമ്മനം മടങ്ങി വരുമെന്ന ആരോപണങ്ങൾക്ക് ശക്തി പകർന്നിരുന്നു .