അന്താരാഷ്ട്ര നാണയനിധിയുടെ ചീഫ് എക്കണോമിസ്റ്റായി ഗീത ഗോപിനാഥ്
അമര്‍ത്യസെന്നിനുശേഷം ഈ പദവിയില്‍ എത്തുന്ന ആദ്യ ഇന്ത്യക്കാരിയാണ് ഗീതാ ഗോപിനാഥ്‌


മുഖ്യമന്ത്രിയുടെ സാമ്പത്തിക ഉപദേഷ്ടാവും മലയാളിയുമായ ഗീതാ ഗോപിനാഥിനെ അന്താരാഷ്ട്ര നാണയനിധിയുടെ ചീഫ് എക്കണോമിസ്റ്റായി നിയമിച്ചു. നിലവില്‍ ഈ സ്ഥാനം വഹിക്കുന്ന മൗരി ഒബ്റ്റ്‌ഫെല്‍ഡ് ഡിസംബറില്‍ സ്ഥാനമൊഴിയുന്ന സ്ഥാനത്തേക്കാണ് നിയമനമെന്ന് ഐഎംഎഫ് ട്വീറ്റിലൂടെ അറിയിച്ചു.ഹവാര്‍ഡ് യൂണിവേഴ്‌സിറ്റിയില്‍ ഇന്റര്‍നാഷണല്‍ സ്റ്റഡീസ് ആന്‍ഡ് എക്കണോമിക്‌സ് വിഭാഗത്തില്‍ പ്രൊഫസറാണ് നിലവില്‍ ഗീതാ ഗോപിനാഥ്. അന്താരാഷ്ട്ര സാമ്പത്തികവും മാക്രോ എക്കണോമിക്‌സുമാണ് ഇവരുടെ ഗവേഷണ തലങ്ങള്‍.2010-ല്‍ 38-ാം വയസ്സിലാണ് ഹാര്‍വാര്‍ഡില്‍ ഗീത സ്ഥിരം പ്രൊഫസറായത്. നൊേബല്‍ സമ്മാനജേതാവായ അമര്‍ത്യസെന്നിനുശേഷം ഈ പദവിയില്‍ എത്തുന്ന ആദ്യ ഇന്ത്യക്കാരിയാണ് ഗീതാ ഗോപിനാഥ്‌ .ഗ്രീസിലും ഐസ് ലാന്‍ഡിലും ഉണ്ടായ സാമ്പത്തിക മാന്ദ്യത്തെപ്പറ്റി ഗീത നടത്തിയ ഗവേഷണങ്ങള്‍ ശ്രദ്ധേയമായിരുന്നു. ഫെഡറല്‍ റിസര്‍വ് ബാങ്കിന്റെ സാമ്പത്തിക ഉപദേശകസമിതിയില്‍ അംഗമാണ് ഇവര്‍. ജി.-20 സംബന്ധിച്ച വിഷയങ്ങളില്‍ ഇന്ത്യന്‍ ധനമന്ത്രാലയത്തിന്റെ ഉപദേശകസമിതി അംഗവുമാണ്.ഈ സര്‍ക്കാരിന്റെ കാലാവധി വരെ നിലനില്‍ക്കുന്ന സാമ്പത്തിക ഉപദേഷ്ടാവിന്റെ തസ്തികയില്‍ ഗീതാ ഗോപിനാഥിനെ മുഖ്യമന്ത്രിയുടെ സാമ്പത്തിക ഉപദേഷ്ടാവായി നിയിമിച്ചിരുന്നു.

Gita Gopinath appointed chief economist at IMF.