જીજ્ઞેશ મેવાણીએ એવી ચીમકી ઉદ્ગારી હતી કે બાબાસાહેબ આંબેડકરની જન્મ જયંતીના દિવસે કોઈ પણ ભાજપના નેતાને બાબાસાહેબની પ્રતિમાને હાથ લાગવા દેવામાં આવશે નહિ. આ ચીમકીનો જવાબ સુરતમાં મહાનગર પાલિકાના કાર્યક્રમ દરમિયાન પત્રકારો સાથે વાતચીત દરમિયાન નાયબ મુખ્યમંત્રી નીતિન પટેલે આપ્યો હતો.
તેમણે કહ્યું હતું કે 14 એપ્રિલને એટલે બાબાસાહેબ આંબેડકરની જયંતીને ભારતીય જનતા પાર્ટીના નેતાઓ, સાંસદો, ધારાસભ્યો, કોર્પોરેટરો અને સભ્યો ખૂબ ઉત્સાહ પૂર્વક ઉજવે છે અને માન પૂર્વક બાબાસાહેબની પ્રતિમાને ફૂલહાર અર્પણ કરે છે. પરંતુ કોઈ એક વ્યક્તિના કહેવાથી કાર્યક્રમ ન કરવો એ યોગ્ય નથી. દેશના મહાન નેતાઓ એ કોઈ વ્યક્તિ, સંસ્થા કે રાજકીય પક્ષ પૂરતા માર્યાદિત નથી. દેશના મહાન નેતાઓએ દેશની આઝાદીમાં અને ઘડતરમાં મહત્ત્વનો ફાળો આપ્યો છે જેને કારણે દેશના સર્વ લોકો અને ભાજપના નેતાઓ અને કાર્યકર્તાઓ તેમનો ઋણ સ્વીકાર કરે છે. તેથી આવતી કાલે મુખ્યમંત્રીથી લઈને દરેક મંત્રીઓ, ધારાસભ્યો પોતપોતાના વિસ્તારમાં જ્યાં જ્યાં બાબાસાહેબની પ્રતિમા હશે ત્યાં જઈ ફૂલહાર અર્પણ કરી બાબા સાહેબનું ઋણ સ્વીકાર કરીશું..