સુરતના યોગીચોક વિસ્તારમાં આવેલી એક દુકાનમાં મારીમારીની ઘટના બની હતી. મળતી વિગતો અનુસાર મોડી રાત્રે કેટલાક ઈસમોએ દુકાનમાં ઘૂસીને ત્યાં બેઠેલા યુવક સાથે મારામારી કરી હતી. દુકાનમાં લાગેલા CCTV કેમેરામાં મારામારીના દૃશ્યો કેદ થયા છે. આ ઈસમો યુવકને ઢોર માર મારીને ફરાર થઈ ગયા હતા. મારામારીનું મુખ્ય કારણ પૈસાની લેતીદેતી જાણવા મળ્યું છે.
ઘટનાની જાણ થતા પોલીસ ઘટના સ્થળે પહોંચી હતી અને CCTV કેમેરાના ફૂટેજના આધારે આરોપીને પકડવા માટે વધુ કાર્યવાહી હાથધરી છે. સરથાણાના યોગીચોક વિસ્તારમાં ડિલક્ષ પાન સેન્ટરમાં 15 જેટલા યુવકોનું ટોળું ધસી આવ્યું હતું અને ત્યાં બેઠેલા એક યુવકને ખૂબ માર માર્યો હતો. ટોળામાંથી એકે યુવકને માથામાં કાચની બોટલ પણ મારી હતી અને તેના ગળામાંથી બે તોલા સોનાની ચેઇન પણ લૂંટી લીધી હતી. પાન સેન્ટરના માલિકને પણ માર મારીને તેનો મોબાઈલ ફોન ઝૂંટવી લઈ ટોળું ફરાર થઈ ગયું હતું.
આ ઘટના અંગે પોલીસે ગુનો નોંધી તપાસ શરૂ કરી હતી. પોલીસ તપાસમાં જાણવા મળ્યું હતું કે આ ઘટના અંગત અદાવતના કારણે થઈ છે. પોલીસ પાસેથી મળતી વિગતો અનુસાર કતારગામ હાથી મંદિર પાસે રહેતા લાલુ ઠુમરે સરથાણા પોલીસ મથકમાં ફરિયાદ નોંધાવી હતી કે, તેના મિત્ર દ્વારા હર્ષિલ ગજેરા પાસેથી દવાખાનાના કામ અર્થે થોડા દિવસો અગાઉ કાર લેવામાં આવી હતી. જે અઠવાડિયા સુધી પરત ન હતી કરવામાં આવી. આ વાતમાં રોષ રાખીને હર્ષિલ ગજેરા અને સંજય કોળી સહિતના 15 જેટલા યુવકોના ટોળાએ તેના પર હુમલો કર્યો હતો. સરથાણા પોલીસે સમગ્ર મામલામાં વધુ તપાસ હાથ ધરી છે..