ગાંધીનગર નજીક આવેલા વાવોલ ગામમાં એક વૃક્ષ ધરાશાયી થવાની ઘટના બની હતી. ફાયર વિભાગના જણાવ્યા અનુસાર વાવોલ ગામ પાસે આવેલા રિંગરોડ પર કીર્તિધામ સોસાયટીની બહાર એક આંબલીનું વર્ષો જૂનું ઘટાદાર વૃક્ષ એકાએક ધરાશાયી થયું હતું. એક મહિલા સોસાયટીની પાસેથી પસાર થતી હતી. તે દરમિયાન આ વૃક્ષ પડવાના કારણે મહિલા વૃક્ષ નીચે દબાઈ ગઈ હતી. વૃક્ષ પડતાની સાથે જ સ્થાનિક લોકો મહિલાની મદદ કરવા માટે પહોંચ્યા હતા અને વૃક્ષની નીચે દબાયેલી મહિલાને બચાવવા ભારે જહેમત કરી હતી.

આ ઘટનાની જાણ ફાયર વિભાગને થતા ફાયર ફાયટરો ઘટના સ્થળે પહોંચ્યા હતા અને વૃક્ષને હટાવી મહિલાની બચાવ કામગીરી હાથધરી હતી. ફાયર કર્મીઓએ વૃક્ષ હટાવીને મહિલાને બહાર કાઢી ત્યાં મહિલા મૃત્યુ થઈ ચૂક્યું હોવાનું જાણવા મળ્યું હતું. બીજી તરફ વૃક્ષ પડવાના કારણે ટ્રાફિક જામના દૃશ્યો સર્જાયા હતા. વરસાદી મોસમના કારણે વૃક્ષની નીચેની જમીનનું ધોવાણ થતા વૃક્ષ પડ્યું હોવાની આશંકાઓ ફાયર વિભાગ દ્વારા સેવાઈ રહી છે..