സൗന്ദര്യത്തിലും സൗകര്യത്തിലും കേമനാകാന്‍ എര്‍ട്ടിഗ



എഴ് പേര്‍ക്ക് സുഖയാത്ര ഉറപ്പ് നല്‍കുന്നു


സൗകര്യവും സൗന്ദര്യവും ഉയര്‍ത്തി രണ്ടാം വരവിനൊരുങ്ങുകയാണ് മാരുതിയുടെ എര്‍ട്ടിഗ.കൂടുതല്‍ സ്‌റ്റൈലിഷായ ഗ്രില്ലും ഡുവല്‍ ബീം പ്രൊജക്ഷന്‍ ഹെഡ്‌ലാമ്പും ഫോഗ്‌ലാമ്പിന് സമീപത്തായി നല്‍കിയിരിക്കുന്ന ക്ലാഡിങ്ങുകളുമാണ് മുന്‍വശത്തെ പുതുമ. സ്‌പോര്‍ട്ടിയായ അലോയിവീലുകളും മസ്‌കുലര്‍ ഷോള്‍ഡര്‍ ലൈനും ക്രോമിയം ഡോര്‍ഹാന്‍ഡിലും ബ്ലാക്ക് ഫിനീഷിങ് ബിപില്ലറുമാണ് വശങ്ങളില്‍ നല്‍കിയിരിക്കുന്നത്. മൂന്നാം നിരയിലെ വിന്‍ഡോ ഗ്ലാസ് പിന്നിലെ ഗ്ലാസുമായി ബന്ധിപ്പിച്ചതും ഷോള്‍ഡര്‍ ലൈനുമാണ് വശങ്ങളിലെ പുതുമ.വുഡന്‍ പാനലുകളുടെ സാന്നിധ്യം ഉയര്‍ത്തിയെന്നതാണ് ഇന്റീരിയറിലെ പ്രധാന പുതുമ.ഹാച്ച്‌ഡോര്‍ കൂടുതല്‍ പുറത്തേക്ക് തള്ളിനില്‍ക്കുന്നതും നമ്പര്‍ പ്ലേറ്റിന്റെ സ്ഥാനം മാറിയതും കൂടുതല്‍ പുതുമ നല്‍കുന്നു. പിന്‍ നിര സീറ്റുകള്‍ സ്‌പേഷിയസ് ആയതിനൊപ്പം ലെഗ് സ്‌പേസ് ഉയര്‍ത്തിയിരിക്കുന്നതിനാല്‍ എഴ് പേര്‍ക്ക് സുഖയാത്ര ഉറപ്പുനല്‍കുന്നുണ്ട്. പിന്നിലേക്ക് ടുവേ എസി വെന്റുകളാണ് നല്‍കിയിരിക്കുന്നത്. ഡോര്‍ പാഡിലും മറ്റുമായി നിരവധി സ്റ്റോറേജ് സ്‌പേസുകളും ഒരുക്കിയിട്ടുണ്ട്. 6.5 ലക്ഷം രൂപ മുതല്‍ 11 ലക്ഷം രൂപ വരെയാണ് വില പ്രതീക്ഷിക്കുന്നത്..