ബുദ്ധ ശില്പ ഗ്രാമം : കുക്ക്ഡി


ബുദ്ധപ്രതിമകള്‍ മാത്രമാണ് ഇവിടെ നിര്‍മിക്കുന്നത്


ബിഹാറിലെ കുക്ക്ഡി എന്ന ഗ്രാമം അറിയപ്പെടുന്നത് ബുദ്ധ ശില്പ ഗ്രാമം എന്നാണ്.പ്രാഥമിക ജീവിതസൗകര്യങ്ങള്‍ക്കുപോലും ഞെരുക്കം അനുഭവപ്പെടുന്ന ഈ ഗ്രാമത്തില്‍ സാക്ഷരതാനിലവാരം വളരെ കുറവാണ്. മണ്ണ് മെഴുകിയ ഓരോ കുടിലിന്‍റെയും ചുമരുകളില്‍ ബുദ്ധന്റെയും പൂക്കളുടെയും ശില്പചിത്രങ്ങള്‍ കാണാം. ബുദ്ധശില്പങ്ങള്‍ മാത്രമാണ് ഇവര്‍ നിര്‍മ്മിക്കുന്നത്. വിവിധഭാവങ്ങളിലുള്ള ബുദ്ധബിംബങ്ങളില്‍ മാത്രം ഇവര്‍ എങ്ങനെ ശ്രദ്ധ കേന്ദ്രീകരിച്ചു എന്നതിനു ഉത്തരമില്ല.ജനന നിയന്ത്രണത്തെക്കുറിച്ച് ഒരറിവുമില്ലാത്ത സമൂഹമാണ് ഇവിടെയുള്ളത്.26 വയസ്സിനുള്ളില്‍ ആറു കുട്ടികളുടെവരെ അമ്മയായവര്‍ ഈ ഗ്രാമത്തിലുണ്ട്. ഗ്രാമത്തിലേക്കെത്തുന്നത് കല്ലിലും മരത്തിലും ഉളിവീഴുന്ന ശബ്ദം കേട്ടുകൊണ്ടാവും. കൊച്ചുകുട്ടികള്‍ മുതല്‍ വയോവൃദ്ധന്മാര്‍വരെ ശില്പികളാണ്.കല്ലിലും മരത്തിലും ഒരുപോലെ നിര്‍മാണ വൈദഗ്ധ്യം പ്രകടമാണ്. സ്ത്രീകള്‍ ചന്ദനത്തിരിനിര്‍മാണത്തിലാണ് ശ്രദ്ധ നല്‍കിയിരിക്കുന്നത്..