സംസ്ഥാനത്ത്‌ കുടുങ്ങിക്കിടക്കുകയായിരുന്ന 58,506 പേരെ ശനിയാഴ്ച രക്ഷപ്പെടുത്തിയതായി മുഖ്യമന്ത്രി അറിയിച്ചു.അപ്പർ കുട്ടനാട്, ചെങ്ങന്നൂർ, ചാലക്കുടി, ആലുവ, പറവൂർ എന്നിവിടങ്ങളിൽ ആയിരക്കണക്കിനാളുകൾ ഇപ്പോഴും കുടുങ്ങിക്കിടക്കുകയാണ്. ഉൾനാടുകളിൽ പലയിടത്തും ഇനിയും രക്ഷാപ്രവർത്തകർക്ക് എത്താനായിട്ടില്ല.ശനിയാഴ്ച മാത്രം 39 പേരാണ് മരിച്ചത്. അഞ്ചുദിവസത്തിനിടെ മരിച്ചവരുടെ എണ്ണം ഇപ്പോൾ 250-നോട് അടുക്കുകയാണ്. വെള്ളമിറങ്ങി രക്ഷാപ്രവർത്തനം പൂർണമായാൽ മാത്രമേ മരണസംഖ്യ തിട്ടപ്പെടുത്താനാവൂ.ചെങ്ങന്നൂരിൽ മാത്രം ശനിയാഴ്ച 12 മൃതദേഹം കണ്ടെത്തിയതായാണ് സ്പെഷ്യൽ ബ്രാഞ്ചിന്റെ കണക്ക്. രക്ഷാപ്രവർത്തകരിൽനിന്ന് ശേഖരിച്ച വിവരമനുസരിച്ചാണിത്. ഇതുവരെ ചെങ്ങന്നൂരിൽ 22 പേർ മരിച്ചതായും കണക്കാക്കുന്നു.ചെങ്ങന്നൂരിലും കുട്ടനാട്ടിലും വീടുകളുടെ ടെറസുകൾക്ക് മുകളിൽ കനത്തമഴ നനഞ്ഞ് ഭക്ഷണമില്ലാതെ കഴിയുന്ന ഒട്ടേറെപ്പേരുടെ സ്ഥിതി ഇനിയും വ്യക്തമല്ല. കുട്ടനാട്ടിൽനിന്ന് കാൽലക്ഷം പേരെ ശനിയാഴ്ച രക്ഷിച്ചു. ഇനിയും ആയിരങ്ങൾ ഒറ്റപ്പെട്ട നിലയിലാണ്. പുരവഞ്ചികൾ, ബോട്ടുകൾ, ജങ്കാറുകൾ എന്നിവയിലാണ് കുടുങ്ങിയവരെ ആലപ്പുഴയിലെ വിവിധ ദുരിതാശ്വാസ കേന്ദ്രങ്ങളിലെത്തിക്കുന്നത്.ചെങ്ങന്നൂരിൽനിന്ന് 17,000 പേരെ ശനിയാഴ്ച ഉച്ചവരെ രക്ഷപ്പെടുത്തി. രക്ഷാപ്രവർത്തകർക്ക് എത്തിപ്പെടാനാവാത്ത ഒട്ടേറെ ഇടങ്ങളിൽ ഇപ്പോഴും അനേകം പേരുണ്ടെന്നാണ് നിഗമനം. പന്പയിൽ ജലനിരപ്പ് താഴ്ന്നപ്പോൾ അച്ചൻകോവിലാറിൽ ജലനിരപ്പുയർന്നതാണ് രക്ഷാപ്രവർത്തനത്തിന് തടസ്സമായത്.

Kerala floods;Still thousands of Salvation from the flood.