ശബരിമലയില്‍ നിരോധനാജ്ഞ നീട്ടി

ജനങ്ങള്‍ നിയമവിരുദ്ധമായി സംഘം ചേരുന്നതും, പ്രകടനം, പൊതുയോഗം, വഴിതടയല്‍ എന്നിവയും നിരോധിച്ചു


ശബരിമലയിലെ നിരോധനാജ്ഞ പത്തനംതിട്ട ജില്ലാ കലക്ടര്‍ നവംബര്‍ 26 വരെ നീട്ടി. എന്നാല്‍ തീര്‍ഥാടകര്‍ക്ക് സംഘം ചേര്‍ന്ന് ശരണം വിളിക്കുന്നതിന് വിലക്കുണ്ടായിരിക്കുന്നതല്ലെന്ന് ഉത്തരവില്‍ പ്രത്യേകം പറയുന്നു. ഇലവുങ്കല്‍, നിലയ്ക്കല്‍, പമ്പ എന്നിവിടങ്ങളിലും ഈ മാസം 26 അര്‍ധരാത്രിവരെ നിരോധനാജ്ഞ തുടരും. ജില്ലാ പൊലീസ് മേധാവിയുടേയും, എഡിഎമ്മിന്റെയും, സന്നിധാനത്തുള്‍പ്പെടെയുള്ള എക്സിക്യൂട്ടീവ് മജിസ്ട്രേറ്റുമാരുടേയും റിപ്പോര്‍ട്ടിന്റെ അടിസ്ഥാനത്തിലാണ് ജില്ലാ മജിസ്ട്രേറ്റ് കൂടിയായ കലക്ടര്‍ പി.ബി.നൂഹ് നിരോധനാജ്ഞ ദീര്‍ഘിപ്പിക്കാന്‍ തീരുമാനിച്ചത്. നിരോധനാജ്ഞ നിലനില്‍ക്കുമ്പോള്‍ പോലും അതുലംഘിക്കാനുള്ള ശ്രമങ്ങള്‍ നടന്നതായി കലക്ടര്‍ വിലയിരുത്തി. ജനങ്ങള്‍ നിയമവിരുദ്ധമായി സംഘം ചേരുന്നതും, പ്രകടനം, പൊതുയോഗം, വഴിതടയല്‍ എന്നിവയും നിരോധിച്ചു. എന്നാല്‍ ശബരിമല ദര്‍ശനത്തിന് ഭക്തര്‍ കൂട്ടം ചേര്‍ന്ന് എത്തുന്നതിന് തടസമുണ്ടാകില്ലെന്ന് ഉത്തരവില്‍ പ്രത്യേകം പറയുന്നു. ജനുവരി 14 നിരോധനാജ്ഞ വരെ നീട്ടണമെന്ന് ജില്ലാ പൊലീസ് മേധാവി ആവശ്യപ്പെട്ടിരുന്നു. നിലവിലെ പ്രതിക്ഷേധങ്ങളും, സംഘര്‍ഷങ്ങളും കണക്കിലെടുത്ത് നിരോധനാജ്ഞ ദീര്‍ഘിപ്പിക്കണമെന്നായിരുന്നു എഡിഎമ്മിന്റെയും നിലപാട്. അതേസമയം, നിരോധനാജ്ഞ പിന്‍വലിക്കണമെന്ന ആവശ്യത്തില്‍ ഉറച്ച് നില്‍ക്കുകയാണ് ബിജെപിയും, കോണ്‍ഗ്രസും.
Subscribe to News60 :https://goo.gl/VnRyuF Read: http://www.news60.in/ https://www.facebook.com/news60ml/

sabarimala 144 extended till Nov 26.