കൂട്ടക്കുഴിമാടത്തിൽ കണ്ടെത്തിയത് 230 അസ്ഥികൂടങ്ങൾ

230 പേരുടെ അസ്ഥികൂടങ്ങളാണ് ശ്രീലങ്കയിലെ മാന്നാർ ടൗണിൽ കണ്ടെത്തിയത്

ശ്രീലങ്കയിലെ മാന്നാർ ടൗണിൽ കെട്ടിടം പണിക്കായി മണ്ണുമാറ്റിയപ്പോൾ കണ്ടെത്തിയ അസ്ഥികൂടങ്ങൾ ഉത്തരമില്ലാത്ത ചോദ്യമായി തുടരുകയാണ്. 230 പേരുടെ അസ്ഥികൂടങ്ങളാണ് ഇവിടെ നടത്തിയ വിശദമായ പരിശോധനയിൽ കണ്ടെത്തിയിരിക്കുന്നത്. ശ്രീലങ്കയിലെ മാന്നാർ ടൗണിൽ നിന്നാണ് ഞെട്ടിക്കുന്ന സംഭവം. ആഗസ്റ്റിൽ ഈ സ്ഥലത്ത് നിന്ന് മനുഷ്യന്റെ അസ്ഥികൂടം കിട്ടിയിരുന്നു. തുടർന്ന് കോടതി ഉത്തരവ് പ്രകാരം നടത്തിയ ഖനനത്തിലാണ് ഇത്രകൂട്ടമായി മനുഷ്യശരീരവശിഷ്ടങ്ങൾ കണ്ടെത്തിയത്. ശ്രീലങ്കൻ സൈന്യവും തമിഴ് പുലികളും തമ്മിൽ നടന്ന യുദ്ധത്തിൽ ഇരുപതിനായിരത്തിലേറെ പേരെ കാണാതായിട്ടുണ്ടെന്ന് മനുഷ്യാവകാശ സംഘടനകൾ മുൻപ് ആരോപിച്ചിരുന്നു. 2009ല്‍ തമിഴ് പുലികളുമായി സൈന്യം നടത്തിയ യുദ്ധത്തിൽ നടന്ന മനുഷ്യകുരുതിയിലേക്ക് വിരൽ ചൂണ്ടുന്നതാണ് ഇപ്പോൾ കൂട്ടമായി കണ്ടെത്തിയ അസ്ഥികൂടങ്ങൾ എന്നും ആരോപണങ്ങള്‍ ഉയരുന്നുണ്ട്. 2014ൽ മാന്നാറിലെ തിരുകേതീശ്വരം ക്ഷേത്രത്തിന് സമീപത്ത് നിന്ന് ഇത്തരത്തില്‍ 96 പേരുടെ മൃതാവശിഷ്ടങ്ങൾ കണ്ടെടുത്തിരുന്നു. ഇപ്പോൾ കണ്ടെത്തിയ അസ്ഥികൂടങ്ങളെല്ലാം ചിതറിത്തെറിച്ച നിലയിലാണ്. അതുകൊണ്ട് തന്നെ ശരീരഘടന മനസിലാക്കാൻ വിദഗ്ധ പരിശോധനകൾ വേണ്ടിവരുമെന്ന് അധികൃതർ വ്യക്തമാക്കുന്നു. തമിഴ് പുലികളും സൈന്യവും തമ്മിൽ നടന്ന യുദ്ധത്തിനിടെ ഈ സ്ഥലത്ത് നിന്ന് ഒട്ടേറെ പേരെ കാണാതായിരുന്നു.

230 skeletons found at country largest site.