കൊച്ചിക്ക് ഒരു 'ഈജിപ്ഷ്യന്‍ രാജ്ഞി'

കൊച്ചിക്ക് ഒരു 'ഈജിപ്ഷ്യന്‍ രാജ്ഞിയും ; കോഴിക്കോടിന് സൗരോര്‍ജ കപ്പലും വരുന്നു

കേരള ഷിപ്പിങ് ആന്‍ഡ് ഇന്‍ലാന്‍ഡ് നാവിഗേഷന്‍ കോര്‍പ്പറേഷന്റെ വിനോദസഞ്ചാര സംഭാവനകളായി കൊച്ചിക്ക് നെഫര്‍റ്റിറ്റിയും കോഴിക്കോടിന് സൗരോര്‍ജ കപ്പലും.കൊച്ചി കടലില്‍ യാത്രകള്‍ നടത്തുന്നതിനായുള്ള ആഡംബര കപ്പലായ നെഫര്‍റ്റിറ്റിയുടെ ഉദ്ഘാടനം മുഖ്യമന്ത്രി പിണറായി വിജയന്റെ സാന്നിധ്യത്തില്‍ ഒക്ടോബര്‍ അവസാനത്തോടെ നടക്കു. ഇതിനൊപ്പം, സൗരോര്‍ജ പാനലുകളുടെ സഹായത്താല്‍ പ്രവര്‍ത്തിക്കുന്ന, ശ്രീലങ്കയില്‍ നിര്‍മാണത്തിലിരിക്കുന്ന സൗരോര്‍ജ കപ്പല്‍ കോഴിക്കോടിന് ലഭിക്കും. നാലു കോടി രൂപ മുതല്‍മുടക്കുള്ള കപ്പല്‍ 2019 ഓഗസ്റ്റില്‍ സജ്ജമാകും. ത്രീഡി തിയേറ്റര്‍, എയര്‍ കണ്ടീഷന്‍ഡ് ഹാള്‍, കുട്ടികള്‍ക്കുള്ള കളിമുറി, സണ്‍ ഡെക്ക്, ബാങ്ക്വറ്റ് ഹാള്‍, ബാര്‍ ലോഞ്ച്, വിനോദ സംവിധാനങ്ങള്‍ എന്നിവയുള്ള നെഫര്‍റ്റിറ്റിക്ക് 200 യാത്രക്കാരെ ഉള്‍ക്കൊള്ളാനാവും. ഈജിപ്ഷ്യന്‍ രാജ്ഞി നെഫര്‍റ്റിറ്റിയുടെ പേരു നല്‍കിയിട്ടുള്ള കപ്പല്‍, സഞ്ചാരികളെ ഓര്‍മിപ്പിക്കുന്നത് ലോകത്തിലെ ഏറ്റവും പുരാതനമായ സംസ്‌കാരങ്ങളിലൊന്നിനെയാണ്.വിനോദസഞ്ചാരികള്‍ക്കു മാത്രമല്ല, മീറ്റിങ്ങുകള്‍ക്കും കമ്പനികളുടെ പാര്‍ട്ടികള്‍ക്കും ആതിഥ്യമരുളാന്‍ നെഫര്‍റ്റിറ്റിക്ക് കഴിയും. കൊച്ചിയില്‍നിന്ന് പുറപ്പെട്ട് ആറു മണിക്കൂര്‍ പുറംകടലിലൂടെയുള്ള യാത്രയാണ് നെഫര്‍റ്റിറ്റി ഒരുക്കുന്നത്. കടലില്‍ 20 നോട്ടിക്കല്‍ മൈല്‍ വരെ ഉള്ളില്‍ പോകാന്‍ കഴിയുന്ന കപ്പലിന് മണിക്കൂറില്‍ 16 കിലോമീറ്റര്‍ വേഗമുണ്ടായിരിക്കും. കൊച്ചി പോര്‍ട്ട് ട്രസ്റ്റിന്റെ സഹകരണത്തില്‍ കസ്റ്റംസ് ജെട്ടിക്ക് സമീപമുള്ള സ്ഥലത്താകും നെഫര്‍റ്റിറ്റിയുടെ ബെര്‍ത്ത് ഉണ്ടാകുക. മലബാറിലെ ജനങ്ങള്‍ക്ക് കടലില്‍ ഉല്ലാസയാത്ര ഒരുക്കുന്നതിന്റെ ഭാഗമായാണ് കോഴിക്കോടിനായി സൗരോര്‍ജ കപ്പല്‍ സജ്ജമാകുന്നത്. ഹ്രസ്വദൂര യാത്രയാണെങ്കിലും കപ്പലിനുള്ളില്‍ തന്നെ ഭക്ഷണവും മറ്റ് സൗകര്യങ്ങളും ഒരുക്കുന്നുണ്ട്. കേരളീയ കലാരൂപങ്ങളുടെ അവതരണവും ഉണ്ടാകും. സാധാരണക്കാര്‍ക്ക് കുറഞ്ഞ ചെലവില്‍ കപ്പല്‍യാത്ര ചെയ്യാനുള്ള സൗകര്യമൊരുക്കുകയാണ് ലക്ഷ്യം.

Nefertiti: The Kochi ship with a 3D theatre.