#Luxury#Hospitality#Sharjah ആതിഥേയത്വത്തിന്റെയും വിനോദ സഞ്ചാരത്തിന്റെയും പുതിയ ലോകമൊരുക്കാൻ മൂന്ന് ആഡംബര പദ്ധതികളുമായി ഷാർജ നിക്ഷേപ വികസന വകുപ്പ് (ഷുറൂഖ്‌).
130 ദശലക്ഷം ദിർഹം ചിലവഴിച്ചൊരുക്കുന്ന പദ്ധതികൾ ദുബായിൽ നടക്കുന്ന അറബ് ട്രാവൽ മാർട്ടിലാണ് അനാവരണം ചെയ്തത്. മലീഹയിലെ അൽ ഫയ ലോഡ്ജ്, കൽബയിലൊരുങ്ങുന്ന കിങ് ഫിഷർ ലോഡ്‌ജ്‌, അൽ ബദായർ മരുഭൂമിയിൽ അൽ ബദായർ ഒയാസിസ്‌ പദ്ധതി എന്നിങ്ങനെ ചരിത്രവും പ്രകൃതിയുടെ മനോഹര കാഴ്ചകളും സമ്മേളിക്കുന്ന കേന്ദ്രങ്ങളാണ് മൂന്നു പദ്ധതികളും.
ഇതിൽ കിങ് ഫിഷർ ലോഡ്ജ് പ്രവർത്തനമാരംഭിച്ചിട്ടുണ്ട്.
ബാക്കി രണ്ടു പദ്ധതികളും ഈ വർഷത്തിന്റെ രണ്ടാം പകുതിയോടെ അതിഥികൾക്കായി തുറന്നു കൊടുക്കും.‘ഷാർജ കളക് ഷൻസ്’ എന്ന പേരിൽ അവതരിപ്പിക്കുന്ന പദ്ധതികളുടെ നടത്തിപ്പ് ചുമതല ഷസ ഹോട്ടൽസിനു കീഴിലുള്ള ‘മിസ്കി’നാണ്. ആഡംബര സൗകര്യങ്ങളും അപൂർവമായ ദൃശ്യാനുഭവങ്ങളും സമ്മേളിക്കുന്ന ആതിഥേയത്വമാണ് കിംഗ് ഫിഷർ ലോഡ്ജിന്റെ സവിശേഷത. ഇന്ത്യൻ മഹാസമുദ്രത്തെ അഭിമുഖീകരിക്കുന്ന ലോഡ്ജിനു ചുറ്റും കണ്ടൽക്കാടുകൾ കാഴ്ചയൊരുക്കുന്നു. തീർത്തും പ്രകൃതി സൗഹൃദ മാതൃകകൾ അവലംബിച്ചാണ് നിർമാണം. അത്യാധുനിക സൗകര്യങ്ങളുള്ള 25 ടെന്റുകളാണ് ഇവിടെ ഒരുക്കിയിട്ടുള്ളത്. കുടുംബങ്ങൾക്ക് ഒരുമിച്ചു താമസിക്കാനും സൗകര്യമുണ്ട്. വെൽനെസ് സെന്റർ, യോഗ ഏരിയ, റസ്റ്ററന്റുകൾ എന്നിവയോടൊപ്പം ജലവിനോദങ്ങൾക്കും സൈക്ലിങ്ങിനുമെല്ലാം കൽബയിൽ പ്രേത്യേകം ഇടങ്ങളുണ്ട്.
പ്രവർത്തനം ആരംഭിച്ച കൽബ ലോഡ്ജിലേക്ക് ഇന്ത്യക്കാരടക്കം ഒട്ടേറെ സഞ്ചാരികളാണ് എത്തുന്നത്.
മലീഹ ആർക്കിയോളജി സെന്ററിന് അടുത്തയാണ് അൽ ഫയ ലോഡ്ജ്. യുഎഇയിലെ തന്നെ ആദ്യത്തെ പെട്രോൾ പമ്പിനു ചുറ്റിലുമായി, പൈതൃക കാഴ്ച സംരക്ഷിച്ചു കൊണ്ടൊരുക്കിയ അൽ ഫയ ലോഡ്ജിന്റെ കാഴ്ച ആരുടെയും മനം കവരും. ലോകത്തിന്റ പല ഭാഗങ്ങളിൽ നിന്നുമുള്ള രുചികളൊരുങ്ങുന്ന റസ്റ്ററന്റ്, സ്പാ എന്നിവയുള്ള ലോഡ്ജിൽ, കരിങ്കല്ലിൽ തീർത്ത രണ്ടു ചെറിയ കെട്ടിടങ്ങളിലായി അഞ്ചു മുറികളാണുള്ളത്. വന്നെത്തുന്നവരുടെ സ്വകാര്യതയ്ക്ക് മുൻഗണന കൊടുത്താണ് അൽ ഫയയിലെ ക്രമീകരണങ്ങൾ.
മരുഭൂ കാഴ്ചകളാണ് അൽ ബദായർ ഒയാസിസ് ഒരുക്കുന്നത്
മരുഭൂ കാഴ്ചകൾക്ക് നടുവിലെ പരമ്പരാഗത എമിറാത്തി അനുഭവങ്ങളൊരുക്കയാണ് അൽ ബദായർ ഒയാസിസ്‌ പ്രജക്റ്റ്. രാത്രി ക്യാംപുകളും എമിറാത്തി രുചികളുമെല്ലാം ഏറ്റവും നൂതനമായ സൗകര്യങ്ങളോടൊപ്പം ഇവിടെയൊരുക്കുന്ന.