સુરત RTO કચેરીની પોલીસ દ્વારા નકલી રસીદ આપીને વહાન ચાલકો પાસે રૂપિયાનું કૌભાંડનો પર્દાફાશ થયો છે. નકલી રસીદના કૌભાંડ મામલે સુરત RTO દ્વારા ફરિયાદ નોંધવામાં આવી છે અને અડાજણ પોલીસ દ્વારા ટ્રાફિકના સેક્ટર 6મા ફરજ બજાવતા કોન્સ્ટેબલ અને ટાઉટની ધરપકડ કરવામાં આવી છે. સમગ્ર ઘટનાની વાત કરવામાં આવે તો ટ્રાફિકના સેક્ટર 6મા ફરજ બજાવી રહેલા એક કોન્સ્ટેબલ અને ટાઉટ વાહન ચાલકોને રોકીને ટ્રાફિકના નિયમનો ભંગ કરવા બદલ વાહન ચાલકને દંડ ફટકારતા હતા. પરંતુ આ કોન્સ્ટેબલ અને ટાઉટ વાહન ચાલકોને RTOની ડુપ્લિકેટ રસીદ આપતા હોવાની બાતમી સુરત RTOના ઇન્ચાર્ઝ અધિકારી પાર્થ જોશીને મળી હતી.

બાતમીના આધારે તપાસ કરતા કૌભાંડની વાત સાચી સાબિત થઈ હતી. જેના કારણે ઇન્ચાર્ઝ અધિકારી પાર્થ જોશી દ્વારા આ મામલે અડાજણ પોલીસ મથકમાં આ મામલે જાણ કરી હતી. RTO અધિકારીની ફરિયાદ બાદ અડાજણ પોલીસે આ મામલે તપાસ આદરતા અડાજણ પોલીસને ટ્રાફિક શાખાના સેક્ટર 6મા ફરજ બજાવતા કોન્સ્ટેબલ દિનેશ ખૈરાનાર તથા ટાઉટ પ્રભાત સાહરકાર દ્વારા સમગ્ર કૌભાંડ આચરવામાં આવ્યું હોવાનું બહાર આવ્યું હતું. જેના કારણે અડાજણ પોલીસે કોન્સ્ટેબલ દિનેશ ખૈરાનાર તથા ટાઉટ પ્રભાત સાહરકારની ધરપકડ કરી કોર્ટમાં રજૂ કર્યા હતા..