તાજેતરમાં સાબરકાંઠામાં બનાવને પગલે પરપ્રાંતિયો પર જે હુમલાના બનાવો બની રહ્યા છે તેના અનુસંધાનમાં પોલીસ સતર્ક બની હતી.પોલીસ દ્વારા સોશિયલ મીડિયામાં ખાસ ધ્યાન રાખવામાં આવી રહ્યું હતું તે દરમિયાન સોશિયલ મીડિયામાં પરપ્રાંતિય લોકોને ટાર્ગેટ કરી માર મારવાની અફવાઓ ફેલાવતા 10 ઇસમોની સાયબર ક્રાઈમે ધરપકડ કરી છે.પોલીસે સાથે જ શહેરના વિવિધ વિસ્તારોમાં પરપ્રાંતિયો માટે કાઉન્સેલિંગ પણ શરૂ કર્યું છે.

પરપ્રાંતીય હુમલાની ઘટનાને પગલે રાજ્યના DGP શિવાનંદ ઝાએ તમામ પોલીસ અધિકારીને કાયદો વ્યવસ્થા જળવાય તે માટે કડક સૂચના આપી હતી અને તેને અનુસંધાનમાં પરપ્રાંતિયો પર થઈ રહેલા હુમલાખોરો અને ધમકી અપનારાઓને શોધી કાઢવા પોલીસે કવાયત હાથ ધરી હતી તો બીજી તરફ પોલીસે સાયબર ક્રાઇમની પણ મદદ લઈને સોશિયલ મીડિયામાં અફવા ફેલાવનાર અને ઉશ્કેરણી ભર્યા મેસેજ કરનાર તથા પોસ્ટ મુકનારને શોધી કાઢ્યા હતા જેમાંથી આજે સાયબર ક્રાઈમે 10 આરોપીઓને ઝડપી પડ્યા છે.સાયબર ક્રાઈમ પાસે આરોપીનું મોટું લિસ્ટ પણ છે અને સમગ્ર રાજ્યની પોલીસની મદદ લઈને જલ્દી થઈ જલ્દી તમામ આરોપી જે સોશિયલ મીડિયામાં અફવા ફેલાવે અને ખોટા મેસેજ વાયરલ કરનારને ઝડપી પાડવામાં આવશે તેવું ક્રાઇમ બ્રાન્ચના જેસીપી જે.કે.ભટ્ટે જણાવ્યું હતું..