അന്ത്യയാത്രയ്ക്ക് ഇനി തൂക്കം നോക്കി വിലയിടില്ല
മൃതദേഹം തൂക്കി നിരക്ക് ഈടാക്കില്ലെന്ന് എയർ ഇന്ത്യയുടെ പ്രഖ്യാപനം


ഇനി മൃതദേഹം തൂക്കി നിരക്ക് ഈടാക്കില്ലെന്ന എയർ ഇന്ത്യയുടെ പ്രഖ്യാപനം വലിയ ആശ്വാസത്തോടെയാണ് പ്രവാസലോകം സ്വീകരിച്ചത്
നാട്ടിലേക്കുള്ള അന്ത്യയാത്രയ്ക്ക് തുക്കംനോക്കി നിരക്ക് ഈടാക്കുന്ന ദേശീയ വിമാനക്കമ്പനിയുടെ നടപടികൾ വലിയപ്രതിഷേധമാണ് എക്കാലത്തും പ്രവാസികളിൽ ഉണ്ടാക്കിയത്. ആ വ്യവസ്ഥയ്ക്ക് ഇപ്പോൾ മാറ്റമായിരിക്കുന്നു. എന്നാൽ ഇതിനുപകരമായി എയർഇന്ത്യ നിശ്ചയിച്ച നിരക്കിനെചൊല്ലി ഇപ്പോൾത്തന്നെ പ്രതിഷേധം ഉയർന്നിട്ടുണ്ട്. തൂക്കംകുറഞ്ഞ ഒരാൾക്ക് നേരത്തെ ഇത്രയുംതുക വേണ്ടി വരില്ലല്ലോ എന്നുവരെ വിമർശനം ഉയർന്നുകഴിഞ്ഞു. എങ്കിലും എയർ ഇന്ത്യയുടെ പുതിയസമീപനം ആശ്വാസകരമാണെന്ന് പൊതുപ്രവർത്തകർ വിലയിരുത്തുന്നു. എന്നാൽ മൃതദേഹങ്ങൾ സൗജന്യമായിത്തന്നെ നാട്ടിലേക്ക് കൊണ്ടുപോകുന്ന സംവിധാനത്തിലേക്ക് അധികൃതരും വിമാനക്കമ്പനി അധികൃതരും തയ്യാറാകണമെന്ന ആവശ്യമാണ് ഇപ്പോഴും എല്ലാവരും ഉന്നയിക്കുന്നത്. അത് തീരെ പ്രായോഗികമല്ലെങ്കിൽ ചെറിയ തുകയോ ഒരാളുടെ ടിക്കറ്റിന്റെ തുകയോ മാത്രം ഈടാക്കിക്കൊണ്ടായിരിക്കണം നിരക്ക് നിശ്ചയിക്കുന്നതെന്നും അവർ പറയുന്നു..