ദീപിക ഡച്ചുകാരി; സ്വാമിയുടെ കണ്ടെത്തല്‍


ദീപിക ഇന്ത്യക്കാരിയല്ലെന്ന വിമര്‍ശനവുമായി സുബ്രഹ്മണ്യന്‍ സ്വാമി

സഞ്ജയ് ലീല ബന്‍സാലി ചിത്രം 'പത്മാവതി'യെ ചൊല്ലി വിവാദം മുറുകുന്നതിനിടെയാണ് പ്രതികരണവുമായി നടി ദീപിക പദുക്കോണ്‍ രംഗത്തെത്തിയത്. ഒരു രാഷ്ട്രം എന്ന നിലയില്‍ എവിടെയാണ് നമ്മള്‍ എത്തിയിരിക്കുന്നത്. പിന്നോട്ടാണോ നമ്മുടെ യാത്രയെന്നും ദീപിക ചോദിച്ചിരുന്നു, എന്നാല്‍ ദീപികയുടെ ഈ പരമാര്‍ശത്തെ വിമര്‍ശിച്ച് ബി.ജെ.പി നേതാവ് സുബ്രഹ്മണ്യന്‍ സ്വാമി രംഗത്തെത്തി. ദീപിക ഇന്ത്യക്കാരിയല്ല, ഒരു ഡച്ച് പൗരയാണെന്നും സുബ്രഹ്മണ്യന്‍ സ്വാമി പറഞ്ഞു.
കൂടാതെ ദീപികയെ വിമര്‍ശിച്ച് സ്വാമി ട്വീറ്റും പോസ്റ്റ് ചെയ്തു. ദീപിക രാഷ്ട്രത്തിന്റെ അധ:പതനത്തെക്കുറിച്ച് ക്ലാസെടുക്കുകയാണ്. ദീപികയുടെ കാഴ്ചപ്പാടില്‍ നിന്ന് പിന്നോട്ടു പോയാല്‍ മാത്രമേ രാജ്യത്തിന് പുരോഗതി കൈവരിക്കാനാവൂവെന്നും അദ്ദേഹം ട്വിറ്ററില് കുറിച്ചു. പത്മാവതി എന്ന ചിത്രം നിരോധിക്കണമെന്ന് ആവശ്യപ്പെട്ട് രജപുത്ര സംഘടനകള്‍ രംഗത്തെത്തിയിരുന്നു. കഴിഞ്ഞ ദിവസം സൂറത്തില്‍ ചിത്രത്തിനെതിരെ പ്രതിഷേധ പ്രകടനം അരങ്ങേറിയിരുന്നു. അതേസമയം, ചിത്രത്തിന്റെ റിലീസിങ് തടയാനാകില്ലെന്ന് സുപ്രീം കോടതി നേരത്തേ വ്യക്തമാക്കിയിരുന്നു.

Padmavati row: Subramanian Swamy hits back at Deepika Padukone.