સુરતી ઇજનેરે 32 દેશોનો પ્રવાસ કરી 15થી વધુ દેશોમાં હજારો લોકોને શંખ વગાડવાની ટ્રેનિંગ આપી છે. વિશ્વમાં પ્રથમ શંખ વગાડવાનું શીખવનાર શંખ ધ્વનિ ક્લબના સ્થાપક બી. જે. શાહે હજારો લોકોને શંખ વગાડતા શીખવ્યું છે. શંખ વગાડવા માટે આ રિટાયર ઇજનેરે ઇન્ડિયા બુક, એશિયા બુક, લિમ્કા બુક ઓફ એવૉર્ડ મેળવી સુરતની ખ્યાતિમાં વધારો કર્યો છે. લોકોના પ્રસંગોમાં શંખના સુરે લોકોના દિલ જીતી લેનાર આ સુરતીનું મુખ્યમંત્રી સહિત અનેક મહાનુભાવ દ્વારા સન્માન કરવામાં આવ્યું છે. આ સુરતી ઇજનેરની વાત કરવામાં આવે તો બી. જે. શાહ 1977મા SVNITમાંથી BE.Civil (MIE) સાથે પાસ કર્યા બાદ તેઓ કામની શોધમાં હતા. ત્યારે છૂટક કામ કરતાં કરતાં તેમને 1982મા સુરત મહાનગર પાલિકામાં આસિ. ઇજનેરની નોકરી મળી હતી.
એક દિવસ સ્વિમિંગ પૂલમાં એક મિત્રને શંખ વગાડતા જોઈ તેમને પણ શંખ વગાડવાનું શીખવાની ઇચ્છા થઈ હતી ત્યારે એ મિત્ર પાસેથી શંખ વગાડવાનું શીખ્યા. શંખ વગાડતા તેમણે શંખ વિશે જાણવાની જીજ્ઞાશાને લીધે ઘણા પંડિતો, સાધુ-સંતો અને વિદ્વાનોને મળ્યા અને ભારતના ઘણા સ્થળોની મુલાકાત લઈને શંખ ઉપર એક પુસ્તક લખ્યું. બી. જે. શાહે લોકોને શંખ વગાડવાનો રસ્તો આપી લોકોને શંખ વગાડતા તો કર્યા પરંતુ આ કળાથી તેમણે લોકોને રોગમુક્ત પણ કર્યા છે કારણકે શંખનાદ કરવાથી શરીરમાંથી ઘણી બીમારીઓ દૂર થાય છે..