ઉનાળામાં કેરીના રસની માંગ લોકોમાં વધારે રહેતી હોય છે. આ સમયે વધુ નફો મેળવવા માટે વેપારીઓ કેરીના રસમાં ભેળસેળ પણ કરતા હોય છે. ભેળસેળની ઘણી ફરિયાદ આરોગ્ય વિભાગને મળતી હોય છે. સુરતના આરોગ્ય વિભાગના અધિકારીઓ દ્વારા સુરતમાં કેરીના રસનું વેચાણ કરતા વિક્રેતાઓને ત્યાં રેડ કરવામાં આવી હતી અને કેરીના રસના સૅમ્પલ લેવામાં આવ્યા હતા.
સુરત આરોગ્ય વિભાગે શુક્રવારે દૂધના સૅમ્પલ લીધા બાદ શનિવારના રોજ કેરીના રસના વિક્રેતા પર તવાઈ બોલાવી હતી. જેમાં આરોગ્ય વિભાગે કતારગામ વેડરોડ પર આવેલા પંડોળ ખાતેના ગોકુળ રસ અને મોરડીયા રસના વેપારીઓને ત્યાં દરોડા પાડ્યાં હતાં અને કેરીના રસમાં કોઈ અન્ય પદાર્થની ભેળસેળ છે કે નહિ એ ચકાસણી કરવા માટે દુકાનો પરથી રસના સૅમ્પલ લીધા હતા. આ સૅમ્પલને આરોગ્ય વિભાગના અધિકારીઓ દ્વારા લૅબોરેટરીમાં તપાસ માટે મોકલવામાં આવ્યાં છે. અધિકારીઓના જણાવ્યા મુજબ જો કેરીના રસમાં આરોગ્યને હાનિકારક કોઈ પણ પદાર્થની ભેળસેળ જણાશે તો રસ વિક્રેતા પર કાયદેસરની કાર્યવાહી કરવામાં આવશે..