આ વર્ષે ધુળેટીના દિવસે નશાની હાલતમાં હથિયારો લઈ આંતક મચાવનાર લેડી ડોન ભૂરીનો વધુ એક વીડિયો સોશિયલ મીડિયા પર વાયરલ થયો છે, જેમાં ભૂરી તેના સાગરીત સાથે ખૂલ્લી તલવાર લઈને રસ્તા પર ફરી રહી છે અને વરાછા વિસ્તારમાં એક પાનના ગલ્લા વાળાને ધમકાવી રહી છે. આ સિવાય ભૂરીએ પાનના ગલ્લાની બહાર જે લોકો ઉભા હતા, તેમને પણ તલવાર બતાવીને ભગાવી દીધા હતા.

આ વીડિયો પરથી તો કહી શકાય કે, લેડી ડોન ભૂરી જેલમાંથી છૂટ્યા બાદ વધુ ખૂંખાર બની છે. વરાછા પોલીસ સ્ટેશનના હદ વિસ્તારમાં હાથમાં છરો લઇ ખુલ્લેઆમ દાદાગીરી કરતી લેડી ડોન ભૂરીની દાદાગીરી CCTV કેમેરામાં કેદ થઈ છે. લેડી ડોનને પોલીસનો કોઈ ડર ના હોય તેમ રસ્તા પર લોકોને ધમકાવે છે. વીડિયોમાં જોઈ શકાય છે કે આતંક મચાવનાર લેડી ડોન સાથે તેનો એક સાથીદાર પણ છે. બંને લોકો એકસાથે મળીને લોકોને ધમકાવી રહ્યા છે અને દુકાનો બંધ કરાવી રહ્યા છે.

સુરતમાં હથિયારો લઇ ખુલ્લેઆમ લોકોને ધમકાવતી લેડી ડોન સામે પોલીસ કાર્યવાહી કેમ નથી કરતી. આ દૃષ્યો પરથી સવાલો એ ઉભા થાય છે કે વરાછા પોલીસ શું કોઈ મોટી ઘટના બને તેની રાહ જોઈ રહી છે.