બાળકોમાં સંસ્કારનું સિંચન કરતા અને બાળકોનું ભવિષ્ય ઉજાગર કરતા શિક્ષકો જ બાળકો પ્રત્યે રાક્ષસીવૃત્તિ દાખવે તેવું કેમ ચાલે? માતાપિતા બાળકોના ઉજ્વળ ભવિષ્ય માટે શાળાએ ભણવા માટે મોકલતા હોય છે પરંતુ ખરેખર શાળામાં બાળકોની સુરક્ષા છે? કારણ કે આ ઘટનાના CCTV ફૂટેજ જોયા પછી તમને એવું લાગશે કે બાળકો શાળામાં સુરક્ષિત નથી.

સુરતના ઉધના વિસ્તામાં આવેલી લિટલ સ્ટાર સ્કૂલ કે જ્યાં શાળાના એક શિક્ષકે વિદ્યાર્થીને ક્રૂરતા પૂર્વક માર માર્યો છે. વિદ્યાર્થી દ્વારા હોમવર્ક કરવામાં આવ્યું નહિ હોય અથવા તો ક્લાસ રૂમમાં કોઈ નાની એવી ભૂલ થઈ હશે પણ આ એક ભૂલના કારણે હેવાન બનેલા શિક્ષકે બાળકને એક બે નહિ પરંતુ એક સાથે 12 થપ્પડ મારી દીઘી હતી. ભૂલના કારણે બાળક શિક્ષક પાસેથી ભૂલની માફી માંગતો રહ્યો બે હાથ જોડીને શિક્ષક સામે કરગરતો રહ્યો પણ શિક્ષકને બાળક પર દયા ન આવી અને થપ્પડથી સંતોષ ન માનતા શિક્ષકે વિદ્યાર્થીને 2 લાત મારી હતી. જો કે મહત્ત્તવની વાત એ છે કે આ શિક્ષક વિદ્યાર્થીને ક્રૂરતા પૂર્વક માર મારતો હતો ત્યારે શાળાનો અન્ય એક વ્યક્તિ પણ ક્લાસ રૂમમાં હાજર હતો પરંતુ આ વ્યક્તિ દ્વારા પણ શિક્ષકને અટકાવવામાં આવ્યો ન હતો..