118 വയസുള്ള ജൂലിയ ഫ്ളോറെസ് ഗിന്നസിലേക്ക്

ലോക മുത്തശ്ശിയായി ജൂലിയ ഫ്ളോറെസ്

ഒരപൂര്‍വ്വ ജന്മദിനാഘോഷത്തിനാണ് ബൊളീവിയയിലെ സക്കാബോ നഗരം കഴിഞ്ഞ ദിവസം സാക്ഷ്യം വഹിച്ചത്.ലോക മുത്തശ്ശി ജൂലിയ ഫ്ലോറെസിന്‍റെ 118ആം ജന്മദിനമാണ് കുടുംബവും നാട്ടുകാരും ഭരണാധികാരികളും ചേര്‍ന്ന് ആഘോഷമാക്കിയത്.റോസ് നിറത്തിലുള്ള ഉടുപ്പും ബൊളീവിയയുടെ പരമ്പരാഗത കച്ചൌബ തൊപ്പിയും ധരിച്ചെത്തിയ ജൂലിയ, തന്‍റെ ഫോട്ടോ പതിച്ച ,തനിക്കേറ്റവും ഇഷ്ടപ്പെട്ട ,പാസ്ത കേക്ക് മുറച്ചാണ് 118ാം ജന്മദിനം ആഘോഷമാക്കിയത്. അകമ്പടിയായി പാട്ടും ബാന്‍‍റും നൃത്തവു മൊക്കെയുണ്ടായിരുന്നു . ചടങ്ങില്‍ സ്ഥലത്തെ മേയര്‍ ജുവാന്‍ കര്‍വജാല്‍ പ്രായം തെളിയിക്കുന്ന ഔദ്യോഗിക രേഖ കുടുംബത്തിന് കൈമാറി. ജൂലിയ ഫ്ലോറെസ് 1900 ഒക്ടോബര്‍ 26 ന് ബൊളിവീയൻ മലനിരകൾക്കരികിൽ ഒരു മൈനിംഗ് ക്യാംപിലാണ് ജനിച്ചത് . കൊച്ചുമകള്‍ അഗസ്റ്റിനാ ബെര്‍നായ്ക്കൊപ്പം സക്കാബായിലാണ് താമസം. ബൊളീവിയൻ മലനിരകളിൽ ആടുകളെയും ലാമകളെയും മേയ്ച്ചാണ് ബാല്യം ചെലവഴിച്ചത്. പിന്നീട് പഴങ്ങളും പച്ചക്കറികളും കൃഷി ചെയ്തു തുടങ്ങി .കുടുംബവുമായി ആലോചിച്ചതിന് ശേഷം ഗിന്നസ് റെക്കോഡിനാവശ്യമായ നടപടികള്‍ കൈകൊള്ളുമെന്ന് മേയര്‍ . കഴിഞ്ഞ ഒരു നൂറ്റാണ്ടിനിടെയുണ്ടായ ബൊളീവിയൻ വിപ്ലവങ്ങൾക്കെല്ലാം ഈ 118 കാരി സാക്ഷിയായിരുന്നു.പ്രായത്തിന്റെ അവശതകൾ ബാധിക്കാതെ, ബൊളീവിയൻ സംഗീതോപകരണമായ ഷരൻഗോ ഗിറ്റാർ വായിച്ചും നാടൻ തനിമയുള്ള പാട്ടുകൾ ആലപിച്ചും 118-ാം വയസ്സിലും ഊർജസ്വലയായി ജീവിക്കുകയാണ് ഫ്ളോറെസ്. മിനിന എന്ന പൂച്ചയും ബ്ലാൻക്വിറ്റ എന്ന കുഞ്ഞൻ പട്ടിയുമാണ് ഫ്ളോറെസ് മുത്തശ്ശിയുടെ സന്തതസഹചാരികൾ.കഴിഞ്ഞ ഏപ്രിലില്‍ ജപ്പാനിലെ നെബി തജിമ എന്ന 117 കാരി മരിച്ചതിനെ തുടര്‍ന്നാണ് ജൂലിയ ഫ്ലോറസിനെ തേടി ലോകമുത്തശ്ശിപ്പട്ടം എത്തിയത്. ലോകത്ത് ഇപ്പോള്‍ 112 വയസ്സുള്ള 36 പേര്‍ ജീവിച്ചിരിപ്പുണ്ട്. അതില്‍ 34 പേരും സ്ത്രീകളാണ്.
ഈ അപൂര്‍വ നിമിഷത്തിന് സാക്ഷ്യം വഹിക്കാനും മുത്തശ്ശിക്കൊപ്പം സെല്‍ഫിയെടുക്കാനും ധാരാളമാളുകള്‍ എത്തിയിരുന്നു.


Subscribe to News60 :https://goo.gl/VnRyuF Read: http://www.news60.in/ https://www.facebook.com/news60ml/

Bolivian Woman Celebrates 118th Birthday.