ഛത്തീസ്ഗഡിൽ വോട്ടു ചെയ്യാന്‍ ട്വിറ്ററില്‍ പ്രധാനമന്ത്രിയുടെ ക്ഷണം

ഛത്തീസ്ഗഡിൽ രണ്ടാം ഘട്ടത്തിൽ 72 സീറ്റുകളിലേക്കാണ് പോളിങ് നടക്കുന്നത്

ഛത്തീസ്ഗഡിൽ രണ്ടാം ഘട്ട വോട്ടെടുപ്പു നടക്കുന്ന സാഹചര്യത്തിൽ വോട്ടർമാരോട് ആഹ്വാനം നടത്തി പ്രധാനമന്ത്രി നരേന്ദ്ര മോദി. ജനങ്ങൾ കൂട്ടമായെത്തി വോട്ടു ചെയ്യണമെന്നായിരുന്നു മോദി തന്റെ ഔദ്യോഗിക അക്കൗണ്ടിലൂടെ ട്വീറ്റ് ചെയ്തത്. ജനാധിപത്യത്തിന്റെ ആഘോഷത്തിൽ ഇതുവഴി പങ്കുചേരണമെന്നും അദ്ദേഹം നിര്‍ദേശിച്ചു. തിരഞ്ഞെടുപ്പു ദിവസങ്ങളിൽ പോളിങ് സ്റ്റേഷനുകളിലെത്തണമെന്നു ട്വിറ്ററിലൂടെ ജനങ്ങളോട് ആഹ്വാനം ചെയ്യുന്നതു മോദിയുടെ പതിവാണ്. ഛത്തീസ്ഗഡിൽ രണ്ടാം ഘട്ടത്തിൽ 72 സീറ്റുകളിലേക്കാണ് പോളിങ് നടക്കുന്നത്. ആദ്യഘട്ടത്തിൽ 76.28 ശതമാനമായിരുന്നു പോളിങ്. 19 ജില്ലകളിലായി നടക്കുന്ന തിരഞ്ഞെടുപ്പിൽ 1079 പേർ മത്സരിക്കുന്നുണ്ട്. 1.54 കോടിയിലേറെ വരുന്ന വോട്ടര്‍മാരിൽ 77,53,337 പേർ പുരുഷന്മാരാണ്. 76,46,382 പേർ വനിതകളും 877 പേർ മറ്റു വിഭാഗത്തിൽപ്പെട്ടവരുമാണ്. 19,336 പോളിങ് ബൂത്തുകളിലാണു തിരഞ്ഞെടുപ്പ് നടക്കുന്നത്. 84,688 ഉദ്യോഗസ്ഥരെയും നിയോഗിച്ചിട്ടുണ്ട്. നക്സൽ ഭീഷണിയുള്ളതിനാൽ ഗരിയബന്ദ് ജില്ലയിലെ രണ്ടു ബൂത്തുകളിൽ രാവിലെ ഏഴിനു വോട്ടെടുപ്പ് ആരംഭിച്ചു. ഇവിടെ പോളിങ് വൈകിട്ട് മൂന്നിന് അവസാനിക്കും. ശേഷിച്ച ബൂത്തുകളിലെല്ലാം രാവിലെ എട്ട് മുതൽ വൈകിട്ട് അഞ്ചു വരെയാണ് വോട്ടെടുപ്പ്.
Subscribe to News60 :https://goo.gl/VnRyuF Read: http://www.news60.in/ https://www.facebook.com/news60ml/

chattisgarh polls modi asks voters to exercise their franchise.