10 ലക്ഷം ലൈക്കിലേക്ക് കേരള പോലീസ്; പഠനവിഷയമാക്കി മൈക്രോസോഫ്റ്റ്

കേരള പോലീസിന്റെ നവമാധ്യമ ഇടപെടലുകളെക്കുറിച്ച് മൈക്രോസോഫ്റ്റ് പഠനം നടത്തുന്നു

ട്രോള്‍ രൂപത്തിലുള്ള മുന്നറിയിപ്പുകളും നിര്‍ദേശങ്ങളും പ്രതികരണങ്ങളുമായി കേരളാ പോലീസിന്റെ ഫെയ്‌സ്ബുക്ക് പേജ് ഇതിനോടകം തന്നെ വൈറലായി കഴിഞ്ഞു.
കുറഞ്ഞ കാലയളവിനുള്ളില്‍ തന്നെ ജനപ്രിയത നേടിയ കേരള പോലീസിന്റെ ഫെയ്‌സ്ബുക്ക് പേജ് പുതുവര്‍ഷം പിറക്കുന്നതോടെ പത്തു ലക്ഷം ലൈക്കാണ് ലക്ഷ്യമിടുന്നത്.
ഇതിന്റെ പ്രചാരത്തിനായി പോലീസ് പോസ്റ്റ് ചെയ്ത പോസ്റ്റും വൈറലായി കൊണ്ടിരിക്കുന്നു. ചട്ടമ്പിനാട് എന്ന സിനിമയിലെ സുരാജ് വെഞ്ഞാറമൂടിന്റെ കഥാപാത്രത്തെ ആസ്പദമാക്കിയുള്ള ട്രോളാണ് പോലീസ് ഇതിനായി ഉപയോഗിച്ചിരിക്കുന്നത്. ലൈക്കുകളുടെ എണ്ണത്തില്‍ ബെംഗളൂരു പോലീസിനേയും ന്യൂയോര്‍ക്ക് പോലീസിനേയും മറികടന്ന കേരളപോലീസ് പുതുവര്‍ഷത്തില്‍ 13 ലക്ഷത്തിലധികം ഫോളോവേഴ്‌സുള്ള നേപ്പാള്‍ പോലീസിനെയാണ് നോട്ടമിട്ടിരിക്കുന്നത്.
നിലവില്‍ 9.55 ലക്ഷത്തോളം ലൈക്കാണ് കേരള പോലീസ് ഫെയ്‌സ്ബുക്ക് പേജിനുള്ളത്.
ഇതിനിടെ നേപ്പാള്‍ പോലീസിനെതിരെയുള്ള ലൈക്ക് ഭീഷണി ചില മലയാളികള്‍ അവരുടെ ഫെയ്‌സ്ബുക്ക് പേജിലും ഉയര്‍ത്തി. തങ്ങളുടെ പോസ്റ്റുകള്‍ക്കടിയില്‍ വ്യാപകമായി മലയാളത്തിലുള്ള സന്ദേശങ്ങള്‍ വന്നതോടെ നേപ്പാള്‍ പോലീസ് കാര്യം മനസ്സിലാകാതെ ഒരുവേള കമന്റ് ബോക്‌സ് അടച്ചുപൂട്ടി. പിന്നീട് കാര്യം മനസ്സിലായപ്പോള്‍ വീണ്ടും തുറന്നു.
ഈ അവസരത്തിൽ തന്നെ കേരള പോലീസിന്റെ നവമാധ്യമ ഇടപെടലുകളെക്കുറിച്ച് മൈക്രോസോഫ്റ്റ് പഠനം നടത്തുന്നു.
പൊതുജനസമ്പർക്കത്തിനുള്ള പോലീസിന്റെ നവമാധ്യമ ഉപയോഗം, അതിന്റെ സ്വാധീനം എന്നിവ വിലയിരുത്തുന്ന ഗവേഷണത്തിന് ഇന്ത്യയിൽനിന്ന് തിരഞ്ഞെടുത്തത് കേരള പോലീസിനെയാണ്. ഫെയ്സ്ബുക്കിൽ നടത്തിയ ശ്രദ്ധേയമായ മുന്നേറ്റങ്ങളുടെ അടിസ്ഥാനത്തിലാണ് കേരള പോലീസിനെ പഠനത്തിനായി തിരഞ്ഞെടുത്തത്. നവമാധ്യമങ്ങളിലൂടെ പൊതുജനങ്ങളുമായുള്ള ആശയവിനിമയത്തിന് കേരള പോലീസിന് ലഭിക്കുന്ന ജനപിന്തുണയും പഠനവിഷയമാകും. .