ഗാന്ധിജയന്തി ദിനം സസ്യാഹാരദിനമായി ആചരിക്കും
തീവണ്ടികളിലും സ്റ്റേഷനുകളിലും റെയിൽവേ സ്ഥാപനങ്ങളിലുമാണ് സസ്യാഹാരം നല്‍കുക

ഗാന്ധിജയന്തിദിനത്തിൽ തീവണ്ടികളിലും സ്റ്റേഷനുകളിലും റെയിൽവേ സ്ഥാപനങ്ങളിലും സസ്യാഹാരം മാത്രം.
സസ്യാഹാരം മാത്രം വിളമ്പാൻ റെയിൽവേ മന്ത്രാലയമാണ് നിർദേശം നല്‍കിയത് . ഗാന്ധിജയന്തി സസ്യാഹാരദിനമായി ആചരിക്കാനാണ് റെയിൽവേയുടെ നിർദേശം. ആദ്യമായാണ് ഇത്തരത്തിൽ ഒരു നിർദേശം റെയിൽവേ സോണൽ മേധാവികൾക്കും തീവണ്ടികളിൽ ഭക്ഷണം നൽകുന്ന ഐ.ആർ.സി.ടി.സി.ക്കും ലഭിക്കുന്നത്. 2018 മുതൽ 2020 വരെയുള്ള മൂന്നു വർഷവും ഗാന്ധിജയന്തിദിനമായ ഒക്ടോബർ രണ്ടിന് ‘സസ്യാഹാര ദിനമായി’ ആചരിക്കാനാണ് വിജ്ഞാപനത്തിൽ പറയുന്നത്.
ഒരാഴ്ച മുമ്പിറങ്ങിയ വിജ്ഞാപനം പല സോണുകളിലും ലഭിച്ചത് കഴിഞ്ഞ ദിവസമാണ്. അതോടെ പലയിടത്തും പ്രതിഷേധം ഉയരുകയും ചെയ്തു.
മാംസാഹാരം മാത്രം വിളമ്പുന്ന ഒട്ടേറെ സ്റ്റാളുകൾ പല റെയിൽവേ സ്റ്റേഷനുകളിലുമുണ്ട്. നിർദേശം നടപ്പിലാക്കിയാൽ ഒരു ദിവസം ഇവ അടച്ചിടേണ്ട അവസ്ഥയും വരും. ഇവർക്ക് പുറമേ യാത്രക്കാരുടെ ഭാഗത്തുനിന്ന് പ്രതിഷേധമുയരുകയുണ്ടായി. ഇതേത്തുടർന്നാണ് മാംസാഹാരം വിളമ്പാനുള്ള അനുമതി ചിലർക്ക് വാക്കാൽ ലഭിച്ചത്. എന്നാൽ, നേരത്തേ ഇറക്കിയ വിജ്ഞാപനം റദ്ദാക്കാൻ റെയിൽവേ തയ്യാറായിട്ടുമില്ല.

Trains, stations to go vegetarian as Railways observes Gandhi Jayanti.