12 പൊതുമേഖലാ ബാങ്കുകള്‍ പ്രതിസന്ധിയിൽ

കിട്ടാക്കടം രൂക്ഷമായി തുടരുന്നത് രാജ്യത്തെ പൊതുമേഖലാ ബാങ്കുകളുടെ നടുവൊടിക്കുന്നു.

2018 ജൂലായ്-സെപ്റ്റംബർ പാദത്തിൽ പൊതുമേഖലാ ബാങ്കുകളുടെ അറ്റ നഷ്ടം 14,716.19 കോടി രൂപ. 21 പൊതുമേഖലാ ബാങ്കുകളിൽ 12 എണ്ണവും നഷ്ടത്തിലാണ്. ഇവയുടെ മൊത്തം നഷ്ടം 17,046.84 കോടി. ഒമ്പത്‌ ബാങ്കുകളാണ് ലാഭത്തിലുള്ളത്. എന്നാൽ, ഇവയുടെ അറ്റാദായം 2,330.65 കോടി രൂപ മാത്രം. കിട്ടാക്കടം പൊതുമേഖലാ ബാങ്കുകളുടെ മൂലധന അടിത്തറയെ ദുർബലപ്പെടുത്തിയതിന് തെളിവാണ് തുടർച്ചയായുള്ള ഭീമൻനഷ്ടം. 2018-19 സാമ്പത്തിക വർഷത്തിന്റെ രണ്ടാം പാദത്തിൽ പൊതുമേഖലാ ബാങ്കുകളിൽ ഏറ്റവുമധികം അറ്റനഷ്ടം പഞ്ചാബ് നാഷണൽ ബാങ്കിനാണ്. 4,532.35 കോടി രൂപയാണ് പി.എൻ.ബി.യുടെ മൂന്നു മാസത്തെ നഷ്ടം. നഷ്ടക്കണക്കിൽ രണ്ടാം സ്ഥാനത്ത് പൊതുമേഖലയിലെ പുതുതലമുറ ബാങ്കായ ഐ.ഡി.ബി.ഐ.യാണ്. 3,602.50 കോടി രൂപയാണ് ഐ.ഡി.ബി.ഐ. ബാങ്കിന്റെ നഷ്ടം. 1,822.71 കോടിയുമായി അലഹബാദ് ബാങ്കാണ് മൂന്നാം സ്ഥാനത്ത്. നടപ്പുസാമ്പത്തിക വർഷത്തിന്റെ ആദ്യപാദത്തിൽ നഷ്ടത്തിലായിരുന്ന എസ്.ബി.ഐ., ഓറിയന്റൽ ബാങ്ക് ഓഫ് കൊമേഴ്‌സ് ബാങ്കുകൾ രണ്ടാം പാദത്തിൽ ലാഭത്തിലെത്തിയത് ആശ്വാസമായി. എസ്.ബി.ഐ. രണ്ടാം പാദത്തിൽ 944.87 കോടി രൂപയുടെ അറ്റാദായം നേടി.
ഒന്നാം പാദത്തിൽ 4,875.85 കോടിയുടെ നഷ്ടത്തിലായിരുന്നു രാജ്യത്തെ ഏറ്റവും വലിയ ബാങ്ക്. പൊതുമേഖലാ ബാങ്കുകളെ പ്രതിസന്ധിയിൽ നിന്ന് കരകയറ്റാനുള്ള ശ്രമങ്ങൾ റിസർവ് ബാങ്കും കേന്ദ്രസർക്കാരും ശക്തമായി തുടരുകയാണ്. പല ബാങ്കുകൾക്കും കേന്ദ്രസർക്കാർ അധിക മൂലധനം അനുവദിച്ചിട്ടുണ്ട്.
Subscribe to News60 :https://goo.gl/VnRyuF Read: http://www.news60.in/ https://www.facebook.com/news60ml/

12 public sector banks are in loss.