ജാഗ്രതയോടെ പോലിസ്! മല ചവിട്ടും മുമ്പ് ഭക്തര്‍ അറിയേണ്ട കാര്യങ്ങള്‍

തിരിച്ചറിയൽ രേഖയില്ലാത്ത ആർക്കും പമ്പ, നിലയ്‌ക്കൽ ചെക്ക്പോസ്റ്റുകൾ കടക്കാനാവില്ല


തുലാമാസ പൂജാവേളയിലെ പോരായ്‌മകൾ പരിഹരിച്ച്, സുരക്ഷാ ക്രമീകരണം കൂടുതല്‍ ശക്തമാക്കിയിരിക്കുകയാണ് ഇക്കുറി പോലിസ് ചിത്തിര ആട്ടവിശേഷത്തിന് നാളെ നട തുറക്കുമ്പോൾ ഭക്തര്‍ തിരിച്ചറിയേണ്ട പല കാര്യങ്ങളുണ്ട് .നാളെ രാവിലെ എട്ടിനു ശേഷമേ ഭക്തരെയും മാദ്ധ്യമങ്ങളെയും കടത്തി വിടൂ. പൊലീസ് വിന്യാസവും നിലയ്‌ക്കലിലെ ഒരുക്കങ്ങളും റിപ്പോർട്ട് ചെയ്യാനെത്തിയ മാദ്ധ്യമങ്ങളെ കടത്തിവിട്ടില്ല. നിലയക്കലിലെ പ്രധാന കവാടത്തിനു മുന്നിലെ റോഡിലും പൊലീസ് ബാരിക്കേഡ് വച്ച് വാഹനങ്ങൾ തടയുന്നുണ്ട്.പമ്പ മുതൽ സന്നിധാനം വരെ കാനനപാത പൊലീസിന്റെ നിയന്ത്രണത്തിലായിരിക്കും. കമാൻഡോകളടക്കം സായുധ സംഘം ഇവർക്കൊപ്പമുണ്ടാകും. ഉന്നത ഉദ്യോഗസ്ഥരെല്ലാം ഇന്നുമുതൽ അവിടെ ക്യാമ്പ് ചെയ്യും. മുഖം തിരിച്ചറിയാൻ കാമറകൾ ഉപയോഗിച്ച് നിരീക്ഷണം ഏർപ്പെടുത്തിയിട്ടുണ്ട്.
യുവതീ പ്രവേശനത്തെ എതിർക്കുന്നവർ ശക്തമായി പ്രതിഷേധിക്കുമെന്ന് ഇന്റലിജൻസ് മുന്നറിയിപ്പുണ്ട്.മല ചവിട്ടാനെത്തുന്നവർ നിലയ്‌ക്കൽ മുതൽ പൊലീസ് നിരീക്ഷണത്തിലായിരിക്കും. ചെക്ക്പോസ്റ്റുകളിൽ എല്ലാ വാഹനങ്ങളും പരിശോധിക്കും. എ.ഡി.ജി.പിമാരായ എസ്.ആനന്ദകൃഷ്‌ണൻ, അനിൽകാന്ത് എന്നിവരുടെ നേതൃത്വത്തിൽ 2,300 പൊലീസുകാരെ വിന്യസിച്ചിട്ടുണ്ട് . നൂറിലേറെ വനിതാ പൊലീസുമുണ്ട്. ചിത്തിര ആട്ടവിശേഷത്തിനായി ശബരിമല നട നാളെ വൈകിട്ട് 5ന് തുറക്കും. ചൊവ്വാ‍ഴ്ച രാവിലെ 5ന് നിർമ്മാല്യവും അഭിഷേകവും നടക്കും. അത്താ‍ഴ പൂജയ്ക്ക് ശേഷം പത്ത് മണിയോടെ ഹരിവരാസനം പാടി നട അടയ്ക്കും. മണ്ഡല പൂജയ്ക്കായി നവംബർ 16 ന് വൈകിട്ട് നട തുറക്കും..