വനിതാ മതിലില്‍ പങ്കെടുക്കാത്തവര്‍ക്ക് വായ്പ നിഷേധിക്കുക, ട്രാന്‍സ്ഫര്‍ ചെയ്യുക, ജോലി ഇല്ലാതാക്കുക, ഭീഷണിപ്പെടുത്തുക തുടങ്ങിയ സംഭവങ്ങളുടെ വിവരങ്ങള്‍ ഞങ്ങള്‍ ശേഖരിച്ചുവരികയാണെന്നും അത്തരക്കാര്‍ക്ക് ഞങ്ങളെ സമീപിക്കാമെന്നും പ്രതിപക്ഷ നേതാവ് രമേശ് ചെന്നിത്തല. തിരുവനന്തപുരത്ത് മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം.ഇക്കാര്യത്തെ നിയമപരമായും രാഷ്ട്രീപരമായും നേരിടും. സര്‍ക്കാരിന്റെ പരിപാടിയല്ല വനിതാ മതില്‍. ഒരു രാഷ്ട്രീയപാര്‍ട്ടിയുടെ പരിപാടിയാണ്. അതില്‍ സര്‍ക്കാര്‍ ഉദ്യോഗസ്ഥര്‍ പോകേണ്ട യാതൊരു കാര്യവുമില്ല. അങ്ങനെ പോകാത്തവരെ ഭീഷണിപ്പെടുത്തുകയും വെല്ലുവിളിക്കുകയും ചെയ്താല്‍ പ്രതിപക്ഷം നേരിടും. സര്‍ക്കാരിന്റെ ഭരണയന്ത്രം ഒരുപാര്‍ട്ടി പരിപാടിക്ക് നഗ്നമായി ദുരുപയോഗം ചെയ്യുന്നതാണ് കാണുന്നത്. കുട്ടികളെ പങ്കെടുപ്പിക്കാന്‍ പാടില്ലെന്നും കോടതി പറഞ്ഞിട്ടുണ്ട്.വനിതാ മതിലില്‍ കുട്ടികള്‍ പങ്കെടുക്കരുതെന്ന ഹൈക്കോടതി ഉത്തരവിനെ വിമർശിച്ച് ബാലാവകാശ കമ്മീഷന്‍ രംഗത്തെത്തിയിരുന്നു എന്നാൽ കോടതി പറയുന്നതും പോലും കേള്‍ക്കാത്ത ഒരു ഭരണകൂടമാണെങ്കില്‍ ഭാവി ഗുരുതരമാകുമെന്നാണ് പറയാനുള്ളതെന്നും ചെന്നിത്തല പറഞ്ഞു. വനിതാ മതിലില്‍ ആരെയും നിര്‍ബന്ധിച്ച് പങ്കെടുപ്പിക്കില്ലെന്ന് സര്‍ക്കാര്‍ ഉറപ്പു വരുത്തണമെന്നും കുട്ടികളെ വനിതാ മതിലില്‍ പങ്കെടുപ്പിക്കരുതെന്നും ഹൈക്കോടതി നിര്‍ദേശിച്ചിരുന്നു. സ്‌കൂളുകളില്‍ ഉള്‍പ്പെടെ ലിംഗ വിവേചനം നിലനില്‍ക്കുന്ന സാഹചര്യത്തിലാണ് കുട്ടികളെ കൂടി പങ്കെടുപ്പിക്കാന്‍ ആഗ്രഹിക്കുന്നതെന്ന് സര്‍ക്കാര്‍ കോടതിയെ അറിയിച്ചെങ്കിലും 18വയസ്സിനു താഴെയുള്ളവരെ വനിതാമതിലില്‍ പങ്കെടപ്പിക്കരുതെന്ന് കോടതി കര്‍ശന നിര്‍ദ്ദേശം നല്‍കിയിരുന്നു .ഹൈക്കോടതി ഉത്തരവ് കുട്ടികളുടെ അവകാശങ്ങള്‍ക്ക് മേലുള്ള കടന്നു കയറ്റമെന്നാണ് കമ്മീഷൻറെ വിമർശനം . പതിനെട്ട് വയസ്സില്‍ താഴെയുള്ളവരെ വനിതാമതിലില്‍ പങ്കെടുപ്പിക്കരുത് എന്നായിരുന്നു ഹൈക്കോടതിയുടെ ഉത്തരവ്. ഈ തീരുമാനം എടുക്കുംമുമ്പ് കുട്ടികളെയോ അല്ലെങ്കില്‍ ബാലാവകാശ കമ്മീഷനെയോ സമീപിക്കണമായിരുന്നുവെന്ന് കമ്മീഷന്‍ ചെയര്‍മാന്‍ പറഞ്ഞു. ഹൈക്കോടതിയുടേത് ജനാധിപത്യവിരുദ്ധവും ഭരണഘടനാവിരുദ്ധവുമാണ് , ഉത്തരവ് ഹൈക്കോടതി തിരുത്തണം, കുട്ടികള്‍ക്കും സംഘടിക്കാനും പ്രതിഷേധിക്കാനുമുള്ള അവകാശമുണ്ട്, അന്താരാഷ്ട്രനിയമങ്ങള്‍ പോലും അത് വ്യക്തമാക്കുന്നുണ്ടെന്നുമായിരുന്നു കമ്മീഷന്റെ നില.